மெல்பேர்ணில் உணர்வுபூர்வமாக நடைபெற்ற மாவீரர்நாள் - 2025

தமிழீழ விடுதலைப்போராட்டத்தில் தங்களது இன்னுயிர்களை ஆகுதியாக்கிய மாவீரர்களை ஒருசேரநினைவுகூருகின்ற தமிழீழ மாவீரர்நாள் நிகழ்வுகள் அவுஸ்திரேலியாவில் மெல்பேர்ண் மாநகரில் மிகவும் உணர்வெழுச்சியுடன் நடைபெற்றது. Burwood East Burwood Reserve மைதானத்தில்  27-11-2025 வியாழக்கிழமை  நடைபெற்ற இந்நிகழ்வானது  மிகவும்  சிறப்பான முறையில் நடைபெற்றது.

இந்நிகழ்வை செல்வி அபிதாரணி சந்திரன் அவர்கள் தமிழ்மொழியிலும் செல்வன் யுவல் கண்ணன் அவர்கள் ஆங்கில மொழியிலும் தொகுத்து வழங்கினார்கள்.  

மாலை 6.05 மணிக்கு மணியொலி எழுப்பலுடன் ஆரம்பமான இந்நிகழ்வில் அவுஸ்திரேலியத் தேசியக்கொடியை கலாநிதி சிறீதரன் அவர்கள் ஏற்றிவைக்க, தமிழீழத் தேசியக்கொடியை மாவீரர் கப்டன் அலைநிலா அவர்களது சகோதரன் திரு கிரிஷாந்த் இரத்தினம் அவர்கள்  ஏற்றிவைத்தார்.

அதனைத்தொடர்ந்து அகவணக்கம் இடம்பெற்றது. 

முதன்மைச்சுடரை தமிழர் ஒருங்கிணைப்புக்குழுவின் செயற்பாட்டாளர் திரு. கஜன் யோகநாதன் அவர்கள் ஏற்றிவைத்ததைத்தார்.

அதனைத் தொடர்ந்து  தாயக விடுதலைப் போராட்டத்தில் முதற் களப்பலியாகிய லெப் சங்கர் அவர்களது திருவுருவப்படத்திற்கு மாவீரர் மேஜர் அசோகன் அவர்களது சகோதரன் திரு கிரிஷாந்தன் இராஜேந்திரன் அவர்களும்,  முதற்பெண்மாவீரர் 2ம் லெப் மாலதி அவர்களது திருவுருவப்படத்திற்கு மாவீரர் கப்டன் ஜெகன் அவர்களது சகோதரி திருமதி நளாயினி நெடுமாறன் அவர்களும் ஈகைச்சுடர்களை ஏற்றிவைத்தார்கள். சமநேரத்தில் மாவீரர்களின் திருவுருவப்படங்கள்தாங்கிய மாதிரி கல்லறைகளுக்கு அவர்களின் பெற்றோர்கள், சகோதரர்கள் மற்றும் உரித்துடையோர்கள் ஈகைச்சுடர்களை ஏற்றிவைத்தனர். அதேநேரத்தில் துயிலுமில்லப் பாடலும் ஒலிக்க மக்கள் மாவீரர்களின் நினைவுக்கல்லறைகளுக்கு முன்பாக அந்தப்பாடலோடு அனைவரும் ஒன்றித்து நின்றிருந்தனர்.

அடுத்து உறுதியுரையும் அதனைத் தொடர்ந்து  மலர்வணக்கமும் இடம்பெற்றது.

மெல்பேர்ண் நகரில் அனைத்துப் பகுதிகளிலும் வாழ்கின்ற பெருந் திரளான தமிழ்மக்கள் வருகைதந்து நிகழ்விடத்தின் மையத்தில் நிறுவப்பட்ட மாவீரர் நினைவுப் பொதுக்கல்லறைக்கும்  ஏனைய மாவீரர்களின் திருவுருவப்படங்கள் வைக்கப்பட்ட கல்லறைகளுக்கும் மிக நீண்டவரிசையில் நின்று  உணர்வுபூர்வமாக  மலர்வணக்கம் செலுத்தினார்கள்.

மலர்வணக்கம் நிறைவுற்றதும் தேசியக்கொடிகள் இறக்கப்பட்டு முடிவுரை உறுதிமொழி என்பவற்றுடன் தமிழீழத் தேசிய மாவீரர்நாள் 2025 நிகழ்வுகள் யாவும் இரவு 8.00 மணியளவில் நிறைவடைந்தது.

வழமைபோன்று இவ்வாண்டும் மாவீரர்கள் நினைவு சுமந்த பதிவுகள் உள்ளிட்ட இன்னும்பல பதிவுகளையும் உள்ளடக்கிய காந்தள்மலர் சஞ்சிகை  வெளியிடப்பட்டது. அத்துடன் 2026_ம் ஆண்டிற்கான தமிழ்த்தாய் நாட்காட்டியும் தாயக படைப்பாளர்கள் எழுதிய போர்க்கால நாவல்கள் மற்றும் கவிதைத் தொகுதிகள் முதலான வெளியீடுகளூம் விற்பனை செய்யப்பட்டன. அவற்றை மக்கள் ஆர்வமுடன் வாங்கிச் சென்றதையும் அவதானிக்கமுடிந்தது.